काळजाला जाळणे नाही बरे | मराठी गझल

        अक्षरगण वृत्त, वृत्त = मेनका
        लगावली = गालगागा गालगागा गालगा

        काळजाला जाळणे नाही बरे
        आतुनी भेगाळणे नाही बरे.

        सोडुनी द्यावे व्यथांना मोकळे
        वेदनांना पाळणे नाही बरे.

        वाचुनी उरणार मागे काय त्या
        आसवांना ढाळणे नाही बरे.

        सुरकुत्या दावेल नक्की तो तुला
        आरशाला भाळणे नाही बरे.

        फाटके लागेल हाती पान ते
        जीवनाला चाळणे नाही बरे.

        श्वासही जातील बघ हे सोडुनी
        सावलीला टाळणे नाही बरे.

        - वसंत शिंदे, सातारा.
        मो.नं. ९९२२७७६०२७